اس آیت کی تفسیر تو یہ ہوگی کہ جس کسی جانور کو اللہ کا نام لئے بغیر ذبح کیا جائے اس کا گوشت نہ کھاؤ جیسا کہ اکثر مفسرین نے اس کو اختیار کیا ہے۔ دوسری تفسیر یوں ہوگی کہ ہر وہ حلال اور جائز چیز جو کوئی کسی کو دے یا کھلاۓ، پلاۓ تو اس وقت اللہ کا نام لینا چاہیے، چیز جس قسم کی ہو، اس کا اعتبار کر تے ہوۓ "اللہ نے دیا ہے" کم از کم کہہ دیا کرے۔ اور ایسی چیزیں نہیں کھانا چاہیے جو کافر، مشرک، مرتد اور بدعتی لوگ منت، مراد کی خاطر کسی دیوی دیوتا، آلات، اوزار، سواریوں، مشینوں اور قبروں کے سامنے رکھتے اور پوجا پاٹ پہ چڑھاوے کے بعد انہیں کھاتے کھلاتے ہوں۔ یہ سب چیزیں اسلئے حرام ہیں کہ وہ سب غیر اللہ کی نزر کی گئیں۔ مسلمانوں اور مومنوں کو اپنے ایمان کی حفاظت کے لئے اپنے پیٹوں کو ایسی چیزوں کے کھانے سے بچانا اور محفوظ رکھنا فرض و لازم ہے ورنہ گناہ گار ہو جاؤگے اور ایمان سرکنے لگے گا۔

ہاں! احادیثِ شریفہ اور روایاتِ قومی سے ثابت شدہ طریقہ پر ہی نزر اللہ نیاز رسول اللہ اور نیاز مہدی مراد اللہ وغیرہ وغیرہ کی صرف نیت کے ساتھ جو چیز مسنون طریقے سے کھلائی جاۓ، اسکا کھانا موجبِ خیر و برکت اور حصولِ فیض روحانی نیز ایصالِ ثواب کا باعث بھی ہے، چنانچہ منقول ہے کے حضرت مہدی علیہ السلام نے فرمایا " جب تک بندۂ خدا، نیاز کا کھانا کھاتا رہتا ہے، اگر ارواح معذب (قابلِ عذاب) ہیں تو اس وقت تک انکو نجات ملتی ہے، اور میاں ملک بخن رضی اللہ عنہ کے والد ملک احمد رحمتہ اللہ علیہ کے عرس کا کھانا کھانے پر سیدنا مہدی موعود علیہ السلام نے فرمایا تمہارے والد بخشے گئے (خاتمِ سلیمانی)۔